03:20 AM
0
Open with fade-slide animation
მიახლოების მოშორება
შეადარე ოფიციალურ კურსს
Open with fade-slide animation
მიახლოების მოშორება
ვრცლად

დღის 3 თემა

17 სექ 2018

თქვენთვის საყურადღებო დღის 3 თემა

ანაკლიის ღრმაწყლოვანი პორტის მასშტაბური საზღვაო სამუშაოები დაიწყო

ნაკლიაში ღრმაწყლოვანი პორტის საზღვაო სამუშაოები დაიწყო, რომელიც მასშტაბითა და საინჟინრო გადაწყვეტით, საქართველოსთვის უპრეცედენტოა.

საზღვაო საუშაოებს მსოფლიოში ერთ-ერთი უდიდესი დამაღრმავებელი გემი „ათენა“ ახორციელებს, რომელიც უკვე ანაკლიის სანაპიროზეა მობილიზებული. „ათენას“ გამოყენებით, ღრმაწყლოვანი პორტის ტერიტორიაზე მოხდება ფსკერის დაღრმავება; ზღვიდან 5 მლნ კუბურ მეტრამდე ქვიშის ამოღება (რეკლამაცია) და ნაპირზე განთავსება. საზღვაო მშენებლობას საერთაშორისო ტენდერში გამარჯვებული, მსოფლიოში ერთ-ერთი ლიდერი საზღვაო-ინფრასტრუქტურული კომპანია Van Oord-ი ჩაატარებს.

საზღვაო სამშენებლო სამუშაოების დაწყებასთან დაკავშირებით, ანაკლიის პორტის ტერიტორიაზე ოფიციალური ღონისძიება გაიმართა და მას საქართველოს ეკონომიკისა და მდგრადი განვითარების მინისტრი გიორგი ქობულია, სამეგრელო-ზემო სვანეთის გუბერნატორი ალექსანდრე მოწერელია, ანაკლიის პორტის პროექტის მენეჯმენტი და დამფუძნებელი მამუკა ხაზარაძე, კომპანია „ვან ოორდის“ პროექტის დირექტორი იაპ ბრუინსმა, ანაკლიის მკვიდრნი და მედიის წარმომადგენლები დაესწრნენ. პროექტის დამფუძნებელმა „ვან ოორდის“ წარმომადგენელსა და საპატიო სტუმრებთან ერთად დაღრმავებისა და რეკლამაციის პირველი სამუშაოები საზეიმოდ გაუშვეს.

„მე მინდა ვთქვა, რომ ანაკლია ეს არის ჩვენთვის ძალიან სეიროზული პროექტი, - განაცხადა საქართველოს ეკონომიკისა და მდგრადი განვითარების მინისტრმა გიორგი ქობულიამ, - „ეს პროექტი პასუხობს საქართველოს ეკონოიკის ზრდის ორ ძალიან მნიშვნელოვან გამოწვევას. პირველი გამოწვევა, ეს არის საქართველოს გეოგრაფიული მდებარეობის გამოყენება და ჩვენი ქვეყნის ლოგისტიკურ დერეფნად ჩამოყალიბება. ჯერჯერობით ეს ხდება არასაკმარისად და ვითარდება არადამაკმაყოფილებელი ტემპებით. ანაკლიის პროექტი შეიტანს ძალიან მნიშვნელოვან შენატანს საქართველოს კონკურენტუნარიანობის გაზრდაში... მეორე - ჩვენ გვინდა, რომ საქართველო ჩამოვაყალიბოთ, როგორც საზღვაო ქვეყანა... ეს ორი გამოწვევა არის ძალიან მნიშვენლოვანი საქართველოსთვის და ჩვენ გვჯერა, რომ ანაკლია და ეს დიდი პროექტი დიდ წვლილს შეიტანს ამ ორი გამოწვევის გადაწყვეტაში.

„დაიწყო უპრეცედენტო მასშტაბის საზღვაო სამუშაოები ანაკლიის პორტში, რომელიც, I ფაზაში, 1 მილიონი კონტეინერის სიმძლავრის იქნება. პირველ ფაზაში, ანაკლიის ოპრტი 1500 ადამიანი დაასაქმებს პირდაპირ და რამოდენიმე ათას ადამიანს - ირიბად. უახლოეს ორ წელიწადში, ჩაიდება დაახლოებით 600 მლნ აშშ დოლარი და დაფინასნების საკითხი მიყვანილია ბოლომდე. ეს იქნება საკმაოდ სერიოზული განაცხადი იმ მარშუტისა, რომელსაც ჰქვია ერთი სარტყელი - ერთი გზა - აბრეშუმის გზა - რომელიც გზას გაუხსნის ცენტრალური აზიის ტვირთებს ევროპისკენ და პირიქით. ეს არის ურპეცედენტო მასშტაბის პროექტი რეგიონში, რომელშიც სხვადასხვა ქვეყნის ინვესტორები მონაწილეობენ. წლების განმავლობაში, ქართველო და უცხოელი ეკონომისტების დათვლით, ანაკლიის პროექტის მთლიანად განვითარებამ ქვეყანაში 60 მილიარდის კონტრიბუცია უნდა შექმნას“, - განაცხადა „ანაკლიის განვითარების კონსორციუმის“ დამფუძნებელმა, მამუკა ხაზარაძემ.

ღონისძიების ფარგლებში, მედიის წარმომადგენლებისთვის, ანაკლიის პორტის ტერიტორიაზე მედია-ტურიც ჩატარდა. ჟურნალისტებმა ღრმაწყლოვანი პორტის სამშენებლო ტერიტორია, მობილიზებული ტექნიკა და რეკლამაციის სამუშაოები დეტალურად დაათვალიერეს.

დამაღრმავებელ გემ “ათენასთან“ ერთად, ანაკლიის პორტის ტერიტორიაზე მობილიზებულია რეკლამაციის მასშტაბური სამუშაოებისთვის მოდერნიზებული მძიმე ტექნიკა და სადრენაჟო სისტემა. ტერიტორიაზე დამონტაჟებულია 2.5 კმ სიგრძის, წყალზე მოტივტივე მილები; ასევე, ვერტიკალური დრენაჟები, რომელთა ჯამური სიგრძე 3,500 კმ-ს უტოლდება. აშენებულია 10 კმ-ის სიგრძის დამბა ზღვიდან ამოღბული დიდი რაოდენობით ქვიშის დასაკავებლად და 2,5 კმ-ის სიგრძის სამელიორაციო არხი. 110 ჰა ფართობის ტერიტორია სრულად გასუფთავებულია და მომზადებულია 5 მლნ კუბური მეტრის ქვიშის განსათავსებლად. დამონტაჟებულია წყლის მარეგულირებელი სისტემა. 110 ჰა ფართობის ტერიტორიაზე მოხსნილი და დასაწყობებულია მიწის ნაყოფიერი (ჰუმუსოვანი) ფენა.

ანაკლიაში უკვე დაიწყო მუშაობა „ვან ოორდის“ სპეციალისტების გუნდმა, რომლის წევრებიც დაღრმავებისა და დიდ მასშტაბზე გათვლილი საზღვაო ინფრასტრუქტურულ სამუშაოებზე სპეციალიზდებიან.

ანაკლიის ღრმაწყლოვანი პორტის მშენებლობა 2017 წლის დეკემბერში ადრეული სახმელეთო სამუშაოებით დაიწყო. პორტის პირველი ფაზის მშენებლობის დასრულება პირველი გემების მიღება 2020 წლის ბოლოსკენ იგეგმება.

ანაკლიის ღრმაწყლოვანი პორტის მშენებლობის შესახებ

მთლიანობაში, ანაკლიის პორტის პირველი ფაზის სამშენებლო სამუშაოების ფარგლებში, მოხდება:

• ფსკერის დაღრმავება და ზღვიდან 15 მლნ კუბურ მეტრამდე ქვიშის ამოღება და ნაპირზე განთავსება.

• საზღვაო აკვატორიის 16 მეტრამდე დაღრმავება.

• 1.6 კმ-იანი ტალღმტეხის აშენება, რომლის გამაგრებაც ზღვაში 1.3 მილიონი ტონა ქვის გამოყენებით მოხდება.

• 625-მეტრის სიგრძის, 3-გემმისადგომიანი, მრავალფუნქციური ტერმინალის მშენებლობა, რომლის ფარგლებში 110 ჰექტარზე იგეგმება ბეტონის საფარის მოწყობა; დამხმარე შენობა-ნაგებობების მშენებლობა.

ანაკლიის პორტის პირველი ფაზისთვის ამუშვებისთვის, აშენდება ინფრასტრუქტურა, რომელიც საქართველოს შესაძლებლობას მისცემს, მიიღოს 10,000-კონტეინერიანი (TEU) პანამაქსის და პოსტპანამაქსის ტიპის გემები, რომელთაც დღესდღეობით საქართველოში არსებული სხვა პორტები ვერ ემსახურება. 2021 წლისთვის ანაკლიის პორტის 1 მილიონამდე TEU კონტეინერის და 1.5 მილიონი ტონა მშრალი ნაყარი ტვირთის გატარებას შეძლებს.

ანაკლიის ღრმაწყლოვანი პორტის მშენებლობა სულ 9 ფაზად არის დაგეგმილი. პროექტის ჯამური ღირებულება 2.5 მილიარდ აშშ დოლარს შეადგენს.

Van Oord-ის შესახებ

ანაკლიის პორტის საზღვაო სამუშაოებს ჰოლანდიური საზღვაო ინფრასტრუქტურული კომპანია Van Oord-ი განახორციელებს. კომპანია მსოფლიოს სხვადასხვა კონტინენტზე საზღვაო და ჰიდრო-საინჟინრო მიმართულებით პროექტების დაგეგმარებასა და შესრულებაზე მუშაობს. მის მიერ განხორციელებულ პროექტებს შორისაა: დუბაის „პალმების კუნძული“, როტერდამის პორტის გაფართოება, სუეცის მეორე არხის აშენება, უდიდესი მილსადენებისა და სხვადასხვა საზღვაო ინფრასტრუქტურული პროექტების მშენებლობა. კომპანია Van Oord-მა ასევე განახორციელა ანაკლიის ღრმაწყლოვანი პორტის წინასამშენებლო კვლევითი სამუშოები.

ბანკთაშორისი გადარიცხვების მიღების დრო ხანგძლივდება

ბანკთაშორისი გადარიცხვების ხელშეწყობის მიზნით, საქართველოს ეროვნული ბანკი მიმდინარე წლის 17 სექტემბრიდან ბანკთაშორისი საგადახდო სისტემის სამუშაო გრაფიკს 1 სთ-ით ახანგრძლივებს, რაც საშუალებას მისცემს კომერციულ ბანკებს მომხმარებლების გადარიცხვები სამუშაო დღის 18:00 საათამდე შეასრულონ.

ეროვნული ბანკის საგადახდო სისტემის ახალი სამუშაო გრაფიკი დადგინდა ბანკთაშორისი საგადახდო სისტემის (RTGS სისტემის) წესებით, რომლის მიხედვით, კლიენტის გადარიცხვების შესრულების ზღვრულ დროდ განისაზღვრა 18:00 სთ. დღემდე ასეთ გადახდებს RTGS სისტემა მხოლოდ 17:00 საათამდე ამუშავებდა. აღნიშნული ცვლილება ზრდის ბანკების შესაძლებლობას კლიენტებისგან მიღებული საგადახდო დავალებები შეასრულონ იმავე დღესვე.

RTGS სისტემა ბანკთაშორისი ეფექტიანი საგადახდო სისტემაა, რომლის დანერგვითაც მინიმუმამდეა დაყვანილი საოპერაციო რისკები, მნიშვნელოვნადაა გაუმჯობესებული სისტემაში გადარიცხვების დამუშავების პროცესი, საოპერაციო საათების განმავლობაში ბანკთაშორისი გადარიცხვები იწარმოება დავალებათა დამუშავების უწყვეტ რეჟიმში, თანამედროვე ტექნოლოგიების გამოყენებით უზრუნველყოფილია წვდომის უსაფრთხოება და სისტემაში გამავალი ინფორმაციის დაცულობა. RTGS სისტემის მართვას საქართველოს ეროვნული ბანკი ახორციელებს. აღნიშნული სისტემის მონაწილეები საქართველოში ლიცენზირებული კომერციული ბანკები და საქართველოს ფინანსთა სამინისტროს სახაზინო სამსახურია, რაც გულისხმობს, რომ ზემოთ აღნიშნული ცვლილება შეეხება როგორც ბანკიდან ბანკში კლიენტების გადარიცხვებს ასევე ფინანსთა სამინისტროს სახაზინო სამსახურში  მიმართულ  გადახდებს.

საპენსიო სააგენტოს დირექტორის პოსტს ლევან სურგულაძე დაიკავებს

სსიპ საპენსიო სააგენტოს დირექტორის პოსტს ლევან სურგულაძე დაიკავებს. ეკონომიკის სამინისტროს ინფორმაციით, საპენსიო სააგენტოს სამეთვალყურეო საბჭომ ლევან სურგულაძე სააგენტოს ხელმძღვანელის თანამდებობაზე კანონის თანახმად, კონკურსის წესით შეარჩია.

სსიპ საპენსიო სააგენტოს დირექტორის პოსტზე საჯარო კონკურსი 10 აგვისტოს გამოცხადდა, სულ შევიდა 70 განაცხადი.

„შემოსული განაცხადებიდან კონკურსის ფინალური ეტაპისთვის სამეთვალყურეო საბჭომ 8 კანდიდატი შეარჩია - მათ 14 სექტემბერს ეკონომიკისა და მდგრადი განვითარების სამინისტროში საბჭოს წევრებთან გასაუბრება გაიარეს. სამეთვალყურეო საბჭომ ლევან სურგულაძე საპენსიო სააგენტოს დირექტორის თანამდებობაზე ერთხმად დაამტკიცა. როგორც საბჭოს თავმჯდომარემ, ეკონომიკისა და მდგრადი განვითარების მინისტრმა გიორგი ქობულიამ აღნიშნა, მისი თანამდებობაზე დანიშვნისას მთავარი ფაქტორები იყო -პროფესიონალიზმი, მდიდარი სამუშაო გამოცდილება და ამ პოსტისთვის საჭირო უნარ-ჩვევები“, - აცხადებენ სამინისტროში.

ლევან სურგულაძე საპენსიო სააგენტოს დირექტორის თანამდებობამდე სს კავკასიის ბიზნეს ჯგუფის სამეთვალყურეო საბჭოს თავმჯდომარის პოსტზე მუშაობდა.