agora financeAGORANEWS

სადაზღვეო ბიზნესი მთავრობას რეგულაციების დაწესებას სთხოვს, რომელიც ამ სექტორში ჯანსაღი კონკურენციის შესაძლებლობას შექმნის.

როგორც სადაზღვეო სექტორის წარმომადგენლები აცხადებენ, აუცილებელია შეჩერდეს საბანკო ექსპანსია, რომელიც კომპანიებს მნიშვნელოვნად აზარალებს და თუ ასე გაგრძელდა, შესაძლოა, სადაზღვევო ბიზნესი მთლიანად იქცეს საბანკო სივრცის ნაწილად.

სწორედ ამ მოთხოვნის ირგვლივ გაერთიანდა 12 სადაზღვეო კომპანია, რომლებიც მთავრობას სამართლიანი თამაშის წესების შექმნას სთხოვს.

სადაზღვეო ბიზნესის წარმომადგენლებს მიაჩნიათ, რომ, როდესაც ბანკი სადაზღვეო კომპანიას ფლობს, მას აქვს დიდი ბერკეტი, რომ მნიშვნელოვანი გავლენა მოახდინოს მომხმარებლის არჩევანზე. შედეგად კი, ბანკების კონტროლის ქვეშ არსებულ სადაზღვევო კომპანიებს ჯამურად სექტორის მოგების 80%-90% მიაქვთ:

„ბანკების კონტროლის ქვეშ არსებულ სადაზღვევო კომპანიებს ჯამურად სექტორის მოგების 80%-90% მიაქვთ, რასაც აღწევენ საკუთარი მომხმარებლის თავისუფალი არჩევანის შეზღუდვით და მათი იძულებით სესხის აღებისას შეიძინონ მხოლოდ მათთან აფილირებილი სადაზღვევო კომპანიების პოლისები; აღნიშნული განსაკუთრებით მკვეთრად იკვეთება „თიბისი ბანკის“, „ბაზისბანკის“ და „საქართველოს ბანკის“ მაგალითზე, სადაც ეს უკანასკნელი კიდევ ერთი სადაზღვევო კომპანიის დაარსებაზე იღებს თანხმობას ეროვნული ბანკისგან.

ჩვენ მივმართავთ ეროვნულ ბანკს, დაზღვევის ზედამხედველის სამსახურს, საქართველოს პარლამენტს და საქართველოს მთავრობას, მიიღონ შესაბამისი ზომები დარგში საბანკო სექტორის ექსპანსიის შესაჩერებლად, ამ შინაარსის მიმართვის წერილი სადაზღვევო ინდუსტრიის მხრიდან ყველა შესაბამის პირს უკვე დაეგზავნა. ზომები დროულად არის მისაღები მდგომარეობა კი დღითიდღე მძიმდება, იმ პირობებში როდესაც ეროვნული ბანკი გასცემს ახალ თანხმობებს და სულ მალე დაზღვევის სექტორში ბანკების კონტროლქვეშ არსებული სადაზღვევო კომპანიები უმრავლესობაში აღმოჩნდებიან", - აღნიშნულია სადაზღვეო კომპანიების მიერ გავრცელებულ ერთობლივ განცხადებასი.