agora financeAGORANEWS

საქართველოს ინფრასტრუქტურის მინისტრს, მაია ცქიტიშვილს საპარლამენტო მოსმენაზე პასნინძლობენ.

ბუნებრივია, რომ განხილვის და დისკუსიის მთავარი თემა ანაკლიის პორტი და მასთან დაკავშირებით შექმნილი პრობლემებია.

როგორც მინისტრმა აღნიშნა, პროექტის ჩაბარების და პირველი გემის პორტში შემოსვლის სავარაუდო თარიღი გადაიწევს და ვადები დაირღვევა:

„ბოლო ინფორმაციით, რაც ჩვენ გვაქვს კონსორციუმიდან, ძირითადი სამუშაოების დაწყება დაგეგმილი იყო 2 აპრილს, თუმცა ვიცით, რომ დეტალური პროექტირება ჯერ კიდევ დაახლოებით 60 პროცენტით არის შესრულებული, არ არის მოზიდული დაფინანსება და აქედან გამომდინარე, ეს ვადებიც, სამწუხაროდ, ნაკლებად რეალურია.

პირველი გემის შემოსვლა კონსორციუმს დაგეგმილი აქვს და გრაფიკითაც გვაქვს გათვალისწინებული 2020 წლის ივლისში, პირველი ფაზის დასრულება კი იგეგმება 2020 წლის 20 ნოემბრისთვის.

სამწუხაროდ, იმის გათვალისწინებით, რომ დაფინანსება ამ პროექტს ჯერ არ აქვს, სავარაუდოდ ეს ვადებიც იქნება დარღვეული და გადაწეული“, – განაცხადა მაია ცქიტიშვილმა.