agora financeAGORANEWS

ევროპარლამენტმა გაზის დირექტივის შესწორებათა პაკეტი დაამტკიცა, რომელიც საზღვაო მილსადენებზე ბრიუსელის კონტროლს გაზრდის. შესწორება უკავშირდება რუსულ პროექტს „ჩრდილოეთის ნაკადი 2“,  რომელიც უკრაინის გვერდის ავლით ევროპაში გაზის იმპორტს გულისხმობს.

„დღეს ჩვენ ვასრულებთ ევროკავშირში გარე მონოპოლიების ერას, რომელიც მომხმარებელს წლების განმავლობაში აიძულებდა ელექტროენერგიის უფრო მაღალი საფასური გადაეხადა. ეს კარგი სიახლეა ჩვენი მოქალაქეებისთვის, წარმოებისთვის და უსაფრთხოებისთვის“, - განაცხადა ევროდეპუტატმა ეჟი ბუზეკმა, რომელიც პროექტის ერთ-ერთი ავტორია.

მოსალოდნელია, რომ ევროპის საბჭო დოუმენტს 2019 წლის ბოლომდე დაამტკიცებს. ახალი დირექტივა ძალაში „ჩრდილოეთის ნაკადი 2-ის“ ამოქმედებამდე უნდა შევიდეს, რათა მისი წესები ამ პროექტზეც გავრცელდეს.

ამ შეთანხმების თანახმად, რუსულმა „გაზპრომმა“ უარი უნდა თქვას ევროპაში გაზის ოპერატორის ფუნქციაზე და ეს როლი დამოუკიდებელ კომპანიას უნდა გადააბაროს. გარდა ამისა, პროექტის ფარგლებში დაგეგმილი გაზის მიწოდება 50%-ით უნდა შემცირდეს.

“ჩრდილოეთის ნაკადი 2“ დიდი ხანია ევროკავშირში უთანხმოების საფუძველია. მილსადენი, რომელმაც ბალტიის ზღვის ფსკერზე უინდა გაიაროს, ევროპაში თხევადი გაზის მიწოდებას უკრაინის გვერდის ავლით უზრუნველყოფს და თითქმის სრულად გამორიცხავს უკრაინის, როგორც სატრანზიტო ქვეყნის როლს.