agora financeAGORANEWS

მეცნიერთა ჯგუფმა მსოფლიოს უმსხვილესი სოციალური ქსელის განვითრების დინამიკა შეისწავლა და დაადგინა, რომ რამდენიმე წელიწადში Facebook-ზე მიცვალებულთა პროფილების რაოდენობა ცოცხალი ადამიანების რაოდენობას გადააჭარბებს.

სოციალურ ქსელში უკვე არის 50 მილიონზე მეტი მემორიალური ექაუნთი, დროთა განავლობაში კი, რასაკვირველია, ეს რიცხვი გაიზრდება, თუმცა რამდენად ჩქარა? ბრიტანელმა მათემატიკოსმა დევიდ ვოთსონმა და მისმა კოლეგამ, კარ იომანმა, შეისწავლეს Facebook-ის „გარდაცვლილთა სეგმენტის“ დინამიკა და გამოთვალეს უახლოესი ათწლეულების პერსპექტივები.

2100 წლისთვის Facebook-ზე მემორიალური პროფილების ოდენობა მინიმუმ 1,4 მილიარდს მიაღწევს. მეცნიერებმა მედველობაში მიიღეს ორი სცენარი. ერთის თანახმად, Facebook შეინარჩუნებს არსებულ აუდიტორიას. მეორე სცენარის მიხედვით კი სოციალური ქსელის აუდიტორია არსებული ტემპით გაიზრდება (ასეთ შემთხვევაში გარდაცვლილთა ექაუნთების რაოდენობამ შესაძლოა 5 მილიარდს მიაღწიოს).

რასაკვირველია, მოვლენათა განვითარების ორივე ვარიანტი გულისხმობს მოცემულობას, როცა სოციალური ქსელი ნარჩუნდება ამავე ფორმით და ის რამე უფრო „თანამედროვეთი“ არ ნაცვლდება.

გარდა ამისა, მეცნიერებმა გაითვალისწინეს გაეროს დემოგრაფიული პროგნოზებიც. გაირკვა, რომ ორივე შემთხვევაში Facebook-ზე მიცვალებულთა რაოდენობა ცოცხლებისას 21-ე საუკუნის მესამე მესამედში გადააჭარბებს, თუმცა თუ Facebook გაფართოვდება, გარდაცვლილთა დიდი ნაწილი აზიისა და აფრიკის რეგიონებიდან იქნება, ხოლო წინააღმდეგ შემთხვევაში - ინდოეთისა და აზიის სხვა რეგიონებიდან (ბანგლადეში, ინდონეზია და ა.შ).

ეს ტენდენცია მომავალში მთელ რიგ ეთიკურ, იურიდიულ და პრაქტიკულ პრობლემას შექმნის. ვოთსონი ამბობს, რომ სოციალურმა ქსელმა უნდა მოიწვიოს ბიოეთიკოსები, სოციოლოგები, არქეოლოგები და ისტორიკოსები, და იმსჯელოს, რას იზამს, როგორ მოექცევა იმ უდიდეს ინფორმაციას, რასაც გარდაცვლილები სოციალურ ქსელში ტოვებენ.