agora financeAGORANEWS

საგარეო ურთიერთობათა კომიტეტის სხდომაზე „საქართველოს (მიმღები) და სკანდინავიურ გარემოს საფინანსო კორპორაციას (როგორც E5P-ის დაფინანსებული პროექტის „საქართველოში საჯარო შენობების ენერგოეფექტურობის გაუმჯობესება და განახლებადი და ალტერნატიული ენერგიის გამოყენება“ განმახორციელებელი სააგენტო) შორის საგრანტო და სასესხო შეთანხმებების“ №1 ცვლილებების შეთანხმებები განიხილეს. მთავრობის მიერ რატიფიცირებისთვის წარმოდგენილი შეთანხმებები კომიტეტის წევრებს ფინანსთა მინისტრის მოადგილემ, გიორგი კაკაურიძემ წარუდგინა.

მომხსენებლის განმარტებით, პროექტის ღირებულება დაახლოებით 4,7 მლნ. ევროა, რომელიც საქართველოში საჯარო შენობების ენერგოეფექტურობის გაუმჯობესებისთვის იქნება მიმართული. 2,83 მლნ. ევროს სესხის სახით სკანდინავიურ გარემოს საფინანსო კორპორაცია (NEFCO) დააფინანსებს, ხოლო აღმოსავლეთი ევროპის ენერგოეფექტურობის და გარემოს დაცვითი თანამშრომლობის ფონდი (E5P) კი გრანტის სახით 1,87 მლნ. ევროს გამოყოფს. წარმოდგენილი ცვლილებებით ხდება გრანტის დახურვის არსებული ვადის 2022 წლის 31 აგვისტომდე გადაწევა.

მთავრობის წარმომადგენელმა კიდევ ერთი, „საქართველოსა და რეკონსტრუქციისა და განვითარების საერთაშორისო ბანკს შორის (განვითრების პოლიტიკის ღონისძიება ეკონომიკური მართვისა და კონკურენტუნარიანობისთვის: დამატებითი სესხი COVID-19-ზე რეაგირებისთვის)“ სასესხო შეთანხმება წარადგინა, რომლის მიხედვით, მსოფლიო ბანკი საქართველოს სახელმწიფო ბიუჯეტის მხარდასაჭერად, დამატებით 45 მლნ. ევროს ოდენობის სესხს გამოუყოფს. სესხის ხანგრძლივობაა 25 წელი მათ შორის, 14 წელი შეღავათიანია, ხოლო საპროცენტო განაკვეთი დამოკიდებულია EURIBOR-ზე.